Hepsîyê ke 87. rojî yo grev de yî hucreyan de yenî tepiştene! 2019-03-12 13:14:07   DUZCE - Zindanê Tîpê T yê Duzceyî de hepsîyê ke roja 87in çalakîya grevê vêşanîye de yê, bi îhlalkerdiş û tedayan dir rî bi rî yê. Keyeyan dîyar kerdî ke hepsîyan ra Suleyman Benzer hucre de yo û vatî derheqê rewşa ey de zanayîş nêameyo girewtene.   Çalakîya grevê vêşanîye ya Hemsereka KCD û Parlamentera HDPyî ya Colemêrgî Leyla Guvene ke bi amancê wedartişê tecrîdê Rayberê PKKyî Abdullah Ocalanî ser o dabî destpêkerdene roja 125an de dewam keno. Dimayê Leylaye bi hezaran hepsî bi eynî waştişî dest bi grev kerdî. Hepisxaneyê Tîpê T yê Duzceyî zî komêke hepsî 87in de grev de yê.   Suleyman Benzer, Mehmet Erbey û hepsîyê bîn ke koma ewil de grev de yê, ame zanayîş ke tedayê cidî dir yenê rî bi rî. Keyeyan dîyar kerdî ke Mehmet Erbey 83 kîlo ra vejîya 67 kîloyan. Eynî wextî de ame zanayîş ke Suleyman Benzer zî hucre de yeno girewtiş û derheqê rewşa ey de zanayîş nêameyo girewtene. Coka ne televîzyon û ne zî heqê ke bîn ra feyde gêno."   'Ma bi caardişê cîyan dir yenê rî bi rî'   Merdimê Mehmet Erbey da zanayîş ke hepsîyan dîyar kerdê ke heta waştişê înan bi ca nêrê do peyser game nêerzê û vatî Mehmetî wina vato: "Hepisxaneyê Duzceyî de caardişê kêfî estê. Ferzkerdişê nîzamê leşkerî esto. Bi tu hawa rojname nêdanê. Tv de 2-3 kanal estê. Pêvînayîşê normal ganî saetêke ya zî 45 deqe bibo. La deqeyê hîrêne de peynî kenê. Ma pers kenê vanê e 'ma senîn biwazê do wina bo' Verê pêvînayîşî nîzamê leşkerî wazenê. Ma verê nê vejîyenê, vanê 'ma do qertê şima, şima ra bigîrê'. Mi zî va şima nêeşkenê bi çîyê wina ma tehdîd bikerê."   Hepîyê ke cezaya înan qedîyaya nînê veradeyene   Ame îdiakerdiş ke talîmatê îhlalkerdişê heqan hetê mudirê zindanî Kazim Kaya ra yeno dayene. Eynî wextî de ame vatiş ke rastê heqeretê gardîyanan zî yenê û roja pêvînayîşî hepsî xêrcê merdimanê xo nêeşkenê kesêke bîn pers bikerê. Verê nê de ame zanayîş ke 4 hepsîyê ke cezaya înan serrêke verê qedîyaya seba cezaya dîsîplînî nêameyê veradayene.