Colemerg de perîn û fistan destê westeyan ra vejîyenê 

2019-03-10 09:45:27


	 

	COLEMÊRG - Colemêrg de perîn û fistanê ke cilê gelerî yê rojê taybet û Newrozan de yenê xo ra dayene, destê westayê cinîyê terzîyan ra vejîyenê û eynî wextî de zî çimeyê debare yê.

	 

	Cinî vera modernîte, kulturê xo heta ewro ardî. Yew nimûneyê tewr gane perîn û fistanê ke cil û belgê adetî yê. Cinîyê Colemêrgî rojê taybet û Newrozan de perîn û fistan viraznenê û nê cil û belgî destê westayê cinîyan ra vejîyenê. Gulşen Îhtîyatoglu (40) ke cilê adetî derznena, hem kulturê xo dana nasnayîş û hem zî pê debara xo kena.

	 

	'Vera cilê adetî eleqeyêke pîl esto'

	 

	Gulşena ke verê keyeyê xo de cilan derznayne, serrêke verê dikanê xo akerde û bi Gulşene dir 2 cinîyê bîn zî xebityenê. Gulşene serê waştişê cinîyan de deştiş kena û wina va: "Cil û belgê ke goreyê model, kumaş û nexşê ci vuryenê. Her serre modelêke cîya yeno waştiş. Deştişê cil û belgê adetî seba mi zaf bi mana yê. Verê dayîkê ma sey cilê rojane xo ra dayene. Hema hema her kesî cilê xo bixo deştêne. La nika tena dawet û rojê taybet de yenê xo ra dayene. Seba ke kulturê ma vindî nêbo mi dest bi deştiş kerd."

	 

	'Azadîya ekonomî ê cinîyan zag girîng a'

	 

	Gulşene dewam de da zanayîş ke qezenckerdişê azadîya ekonomî ê cinîyan zaf girîng a û wina va: "Mi heme zincîr û nêzdîbîyayîşê vera cinîyan şikna. Merdimî êdî ma  qebûl kenê. Heta destê ma ra bêro ma wazenê karê xo baş bikerê. Verê ez keye de roniştine. La merdim biwazo eşkeno heme çî bikero. Ganî cinî bixebityê. Bi taybet ganî cinîyê Colemêrgî bixebityê. Bi xebate dir xobawerkerdiş zî zêde beno."

	 

	'Ganî cinî tewr zêde wareyê xebate de ca bigîrê'

	 

	Asya Gulere zî arde ziwan ke Colemêrg de zaf tay terzîyê cinî estê û wina va: "Ganî wareyê îstîhdamî cinîyan tewr zêde bê. Cinî çi kar bikerê tewr baş kenê. Ma bi xêrê terzîyê cilê adetî derznenê kulturê xo danê cuyayîş. Seba ke ez embazanê xo ra xizmet gêna zaf kêfweş a."