'Vera tedayan do hêvî û xoverdayîşê cinîyan serkewte bibo' 

2019-03-10 09:41:35


	 

	Berîtan Canozer

	 

	AMED - Cinîyê ke bi heme renganê xo seba weçînayîşî amadekarîyan kenê, kuçe bi kuçe, taxe bi taxe xebatan meşnenê û dîyar kenê ke do vera tedayan do cinî serkewte bibê û do hêvî û xoverdayîşê cinîyan qezenc bikero.

	Xebatê weçînayîşî bi lezgînî dewam kenê. Meclîsê Cinîyan ê HDPyî, rojê vîyarte de bi eşkarekerdişê netîcenameyê cinîyan dir, qerarbîyaye û îradeyê xo bi pêroyî vetî meydan.

	 

	'Ma do wareyan terk nêkerê'

	 

	Endama Tevgerê Cinîyanê Azadan (TJA) Ceylan Aslane arde ziwan ke weçînayîşê seba cinîyan zaf girîngê û sebebê nê zî, hêrişê qayûman ê vera destkewtişê cinîyan o. Ceylane qiseykerdişê xo wina dewm kerde: "Xêrcê qezenckerdişî rayîr çin o. Qayûman heme hêrişê aîdê cinîyan çin kerd. Abîdeyê ma şiknayî. Sazgehê ma padayî. Amancê tewr pîl ê qayûman hedefgirewtişê destkewtişan bi. No weçînayîş seba nê girîng o. Ganî bi taybet cinî vejîyê wareyan. Ma cinîyan qetî ware terk nêkerdû ma do terk zî nêkerê. Ganî heme cinî wayîrê sindoqan vejîyê û wareyan de bê."

	 

	'Ma do erjê xo newe ra awan bikerê'

	 

	Namzeda hemşaredarîya Hezro Gulîstan Ektîye zî bale ante coş û kelecanê cinîyan ser û wina va: "Qayûm yenê maneya qirkerdiş û talanî. Wexto ke qirkerdiş û talankerdiş bibo zî aştî çin a. Coka cinî vera talan û qirkerdişî wareyan de bê. Serê beden, cu û qerarê cinîyan sîyaset yeno meşnayîş. Cinî zî nê qebul nêkenê. Vera şarê Kurdî polîtîkayê şerî yeno meşnayîş. Krîzê ekonomî esto. Vera tacîz, tecawiz û kiştişê cinîyan ganî ma şêrê sindoqan ser û wayîrê îradeyê xo vejîyê. Gerek ma erjê xo newe ra awan bikerê."

	 

	'Têkoşînê cinîyan do faşîzm bero'

	 

	Hemşaredara Qilabanê Şirnexî Zeynep Urena ke qayûm tayînê cayê aye bi, da zanayîş ke faşîzm heme rayîran de hêrişê destkewtişê cinîyan kenê û va hêrişê vera destkewtiş û heqê cinîyan bi hewayêke eşkera meydan de yo. Zeynebe dewam de wina va: "Zanê ke ma nê hêrişan ra bêveng nêmanenê. Şarê Kurd, cinîyê Kurd û heme hetê demokrat ganî hêrişan bipelçiqnê û biresê serkewtiş. Ma xurt ê, bi qerar ê û ma vernê de şaredarî û dima ra zî heme destkewtişê xo peyser bigîrê. Têkoşînê cinîyanê Kurdan do faşîzmî bero. No weçînayîş têkoşînê merdimayî yo. Ma do nê têkoşîn de serkewte bibê. Ma do înan bajaranê xo ra bieşrawê."