
'Hemverê tecrîdî vejîyayîş têkoşînêke huqûqî yo' 

2019-03-09 10:21:13


	&nbsp;

	WAN - Endama Meclîsê qezaya Tuşbayî Serap Guvençe dîyar kerde ke waştişê wedartişê tecrîdê Îmralî eynî wextî de têkoşînêke huqûqî yo û arde ziwan ke ganî seba aştî û demokrasîya Tirkîya ganî tecrîd bêro wedartiş.

	&nbsp;

	Çalakîya grevê vêşanîye ya hemsereka KCDî û parlamentera HDPyî ya Colemêrgî Leyla Guvene ke bi amancê wedartişê tecrîdê serê Rayberê PKKyî Abdullah Ocalanî dabî destpêkerdiş roja 122an de dewam keno. Dimayê Leylaye grevê hepisxaneyan ameyo destpêkerdiş zî heme hepisxaneyî û xeylê welatan de vila bi. Piştdayîşê seba grevan her ke şinê pîl benê û hema zî seba wedartişê tecrîdî game nêameyê eştiş.

	&nbsp;

	Qezaya Tuşbayê Wanî de cinîyan vera tecrîdî reaksîyonê xo ardî ziwan û veng dayî ke ganî cewab bidê nê vengdayîşî.

	&nbsp;

	'Wedartişê tecrîdî têkoşînêke huqûqî yo'

	&nbsp;

	Endama meclîsê qezaya Tuşbayî Serap Guvençe, çalakgerê grevê vêşanîye selam kerde û va 'waştişê înan waştişê înan hemine yo'. Serape da zanayîş ke îhlalkerdişê heqê pêvînayîşî bi keye û avûkatan dir tewqîfkerdeyêke nimuneyê tewr akerde ê vera huqûqî yo. Serape nê çî vatî: "Coka no waştişê wedartişê tecrîdî têkoşînêke huqûqî yo. Seba demokrasî awan bibo, ganî vernê de tecrîdê Abdullah Ocalanî ser bêro wedartiş. Tirkîya de ganî komarêke demokratîk bibo. Ma têkoşînê nê danê. Ma heqê merdiman û xoserbîyayîşê hukmî û huqûqî pawenê. Seba nê bi ca bêrê zî ganî tecrîd bêro şiknayîş."

	&nbsp;

	Serape tewr peyîn qiseykerdişê xo de veng da heme şarî û va: "Ez veng dana heme şarî Tirkîya. Bêrê ma prosesêke heme heqê merdiman yenê îhlalkerdene de bibê yew. Ma aştî, demokrasî û huqûq bipawê û vernîye Tirkîya abikerê. Leyla Guvene 122 rojî yo grev de ya. Ma reyke bîn zî vanê. Waştişê Leylaye waştişê ma yê. Ganî ma veng bidê Leylaye."

	&nbsp;

	Cinîya bi nameyê Devlet Çîftçîye zî da zanayîş ke seba teda û îşkenceyê dewlete serra 1994an de dewa ra koç kerdê û va no zîhnîyet hîna zî dewam keno û wina va: "Bi serran o tecrîd ma ser de yeno meşnayîş. Zulm şarî Kurdî rê kenê. Nika domanê ma seba Rayberî kewtê grev. Ma sifre danê ro ma nêeşkenê nan biwerê. Ma ewnîyenê dewlete ra eynî ya. Çîyêke bivuryo çin o. Ganî heme şar dest bido yewbînan û nê tecrîdî bişiknê. Wa heme hepsîyê ke seba ziwan û azadî ameyê tepiştiş serbest bêrê veradayîş."

	&nbsp;