'Vera polîtîkayê tersî xoverdayîşê Leylaye cesaret dano' 

2019-03-05 13:18:47


	 

	ÎZMÎR - Cinîyê ke şî serdayîşê Hemsereka KCDî û Parlamentera HDPyî ya Colemêrgî Leyla Guvene ke vera tecrîdî gerv de ya, dîyar kerde ke tecrîd polîtîkayê awankerdişê tersî yo, la înan xoverdayîşê Leylaye ra cesaret gênê.

	 

	Çalakîya grevê vêşanîye ya Parlamentera HDPyî ya Colemêrgî û Hemsereka KCDyî Leyla Guvene ke seba wedartişê tecrîdî Rayberê PKKyî Abdullah Ocalan ser dabî destpêkerdene roja 118ine de dewam kena. Serdayîşê piştdayîşê bi Leylaye dir dewam kenê. Îzmîr ra, Namzeda Meclîsê Şaredarîya Karşiyaka Yeşîm Tuna Kiziltoprak û Hemsereka HDPyî Îzmîrî Besrîye Tekgur şî serdayîşê Leylaye û dîyar kerdî ke xoverdayîşê grevê vêşanîye seba şar têhet biciwîyê yena kerdene.

	 

	Yeşîme da zanayîş ke çalakîya Leylaye zaf girîng a û va Leylaye moral daya înan û wina va: "Leylaye va 'Bêşik ma do rojêke bimirê, merdişêke bi mana tercîhê mi bi'. Va ‘heta tecrîd nêwedarnê' do fek çalakîya xo vera nêdo. Mi aye ra va ez sey Tirkêke, kulturê Kurdan esas gênê. Leylaye zî va ‘sîstem gonî ser wayîr beno. Mabêne şaran de problem çin o. HDP seba têduştîyê şaran têkoşîn keno.

	 

	'Vera sîstemê faşîst têkoşîn dewam keno'

	 

	Besrîye Tekgure zî arde ziwan ke Leylaye vata cinîyê Îzmîr, Mugla, Manîsa, Enqere û bajarê rojawan ra yenê moral danê aye û wina va: "Seba vengê Leylaye nîno eşnawitiş, astengîyê sîstemê faşîst yenê kerdene. La pêwa nê ma têkoşînê xo dewam kenê. Sîstemo ke bi problemê ekonomî rojeve de yo, cinî seba destkewtişê xo yê qij vindî nêkerê, wazenê vejîyê planê vernî. La her kes zano ke Leyla û embazê aye seba azadî têkoşîn kenê. La bêvengî feyde nêkeno. Bi hawayêke ez hêvî kena ke do dimayê 31ê Adare no bêvengî bişikîyo. Serê HDP û şarê Kurd de tedayê pîl estê. Hukmat mîyanê tersî de yo. Heme hemserek û nêzdîyê 10 hezar HDPyî tepişnayeyê. Tecrîd tena înan ser o ney, heme Tirkîya ser yeno kerdene."