Xoverdayîşê Leyla Guvene roja 117ine de yo  

2019-03-04 13:23:34


	 

	AMED - Xoverdayîşê grevê vêşanîye yê bêdem û anêgêrayîşî yê hemsereka KCDyî û Parlementera HDPyî Leyla Guvena ke seba wedarnayîşê tecrîdê serê Rayberê PKKyî Abdullah Ocalanî dest pê kerdbî, kewt roja 117. Sewbîna çalakîyê grevê vêşanîye ke seba eynî waştişan dest pêkerdbî zî bi qerardarî dewam kenî.

	 

	Xoverdayîşê çalakîyê grevê vêşanîye yê bêdem û anêgêrayîşî ke bi serkêşîya hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvene dest pêkerdbî dewam kenî. Xoverdayîşê Leyla  Guvene 117 rojan xo dima vera da. Leylaye 8ê Teşrîna Peyêne de Zindanê Amedî de dest bi grevê vêşanîye kerde û badê ke 25ê Çele de serbest ameye veradayene keyeyê xo de çalakîya xo dewam kena. Ganî bêro vîrvistiş ke rewşa weşîya çalakgeran her ke şona xidar bena.

	 

	'Waştişê Leylaye waştişê ma yo' 

	 

	Heta roja ewro îro Tirkîya û hem zî teberê welat temsîlkarê xeylê sazgeh û kesê namdar ameyî serdayîşê Leylaye. Kesê ke piştdayîşê Leylaye kenê vanê ke waştişê Leylaye waştişê înan o, tecrîd sucê merdimayî yo û hukmat ra ma wazenê ke no tecrîd bêro wedartiş.

	 

	Hunermend Kadîr Çat û Koma Pelî ra Îlyas Arzu ameyî serdayîşê Leylaye û seba aye deyîre vatî û deyîra ke Kemal Pîro ke Zindanê Hûmara 5in Amedî de bedenê xo da verê mergî, Mazlûm Dogano ke eynî zîndanê de bedenê xo kerd adirê Newroze vano bi nameyê "Kemal Pîr Yoldaş(Embaz Kemal Pîr)" vatî.

	 

	Cinîyê ke Stenbol Îzmîr, Antalya, Mêrsîn û Edeneyî ameyî, hemkarê HDKî û axtîvîstê TJAyî ke Êlih ra ameyî, dîyar kerdî ke waştişê Leylaye waştişê înan o û ganî waştişê înan bêro kebulkerdiş.

	 

	Grevê vêşanî roj bi roje vila benê

	 

	Sewbîna çalakîya endamê HDPyî Nasir Yagirzî ke seba eynî taleban Hewlêrî de dest bi grevê vêşanîye kerdbî zî kewte roja 104 Çalakîya 14 çalakgeranê bajarê Strasboûrgî yê Fransa û Îmam Şîşî yê Gallerî zî kewte roja 78. Grevê vêşanîye yê bêdem û anêgêrayîşî ke zindananê bakurê Kurdistan û Tirkîye de bi tewrbîyayîşê 317 hepsîyan ra zêde dest pêkerdbî zî roja 79. xo dima vera da. Sewbîna Mexmûr, Hewlêr, Şengal û xeylê cayanê cîya-cîyayan de zî seba piştîdayîşê grevê vêşanîye çalakîyê grevê vêşanîye pê yenî.

	 

	Ganî gamî bêrê eştene

	 

	Heto bîn ra reaksîyonê raya pêroyî yê vera îqtîdarî estê û vengdayîş yeno kerdene rê îqtîdar hîna bêvengîyê xo xira nêkerdo.