Ver bi 8 Adare: Seba tecrîd peynî bibo vejîyê wareyan 

2019-03-02 11:24:16


	 

	STENBOL - Stenbol de cinî seba mîtîngê 8ê Adare amadekarîyan kenê, seba têkoşînê vera krîzê ekonomî, şîdet û şer berz bikerê do wareyan de bê. Cinîyan dîyar kerdî ke do vengê Leyla Guvenevera tecrîdî dest bi grev kerda, berz bikerê û vatî do ê zî vera tecrîdê ke keye de dest pêekno heta her warê cu vila bîyo do vengê xo berz bikerê.

	 

	Stenbol de cinî do 8ê Adare Roja Cinîyan ya Dinya verê Forumê Marmarayî de bêrê têhet û bi rayşîyayîşê warê Bazarî yê Bakirkoy de mîtîng pîroz bikerê. Bi rayberîya Platformê Cinîyan ya 8ê Adare ê Stenbolî bi sloganê 'Ma seba azadîya xo xoverdayîş de yê; ma vera krîz, şer û şîdetî wareyan de bê' do bêrê têhet.

	 

	Îdarekara Partîya Kede (EMEP) ya Stenbolî û endama platformî Şenay Kumuze va serra vîyarte 8ê Adare Warê Azadîye ya Bakirkoy de pîroz kerdê la emsar destur nêdayê û wina va: "Roj bi roje wareyê cinîyan yenê xespkerdiş. Ewro wareyê ke ma waştişê xo anê ziwan zî yenê padayîş. Coka ma fek wareyê mitîngî ra vera nêdê. Têkoşîn sey her ware no ware de zî dewam bikero. Ma emsar mîtîng Bakirkoy de Wareyê Pazarî de kenê. Ma do seba heqê cuya xo, xo ver bidê. Dînamîkê sereyîn ê 8ê Adare têkoşîn o. Şîdetê serê cinîyan her ke şino zêde beno. Ma cinî ma do fek têkoşînê xo ra vera nêdê. Coka ma do 3ê Adare de wareyê mîtîngî de bê."

	 

	'Ma heqê keda xo wazenê'

	 

	Endama Partîya Kede ya Sosyalîst (SEP) Sevgî Ozturke da zanayîş ke seba destkewtişê cinîyan bêrê pawitiş û destkewtişê newe bêrê bidestkerdiş xetê têkoşînî yê hempar girîng ê û wina va: "Bi têkoşînê hempar xeylê heq ameyê bidestkerdiş. Nika 'qanûnê efûyî yê îstîsmarê zayendî' rojeve de yo. No qanûn 2016 de zî ame rojeve la bi têkoşîn peyser ame eştiş. 8ê Adare rojêka girîng a û na roje de cinî eşkenê waştişê xo bîyarê ziwan. Seba azadîya cinîyan xeylê waştişê ma estê. Coka ma heme cinîyan 3ê Adare de dawetê wareyî kenê."

	 

	'Şer bixo rayîrê şîdetî zî zêde keno'

	 

	Aktîvîsta TJAyî Çîçek Ariçe dîyar kerde ke cinî wextêke derg o wareyan de yê û wina va: "Emsar xoverdayîşê grevê vêşanîye ya Leyla Guvene dayo destpêkerdiş girîng o. Bi 8ê Adare dir do cinî tewr zêde beşdarê xeta têkoşînî bibê. Ez bawer a ke do vera tecrîdî veng bêro vetiş, vera şîdetî tewr zêde îtîraz bêrê kerdene. Sebebê esas ê şîdetî şer o. Eynî wextî de xo dir krîzê ekonomî zî ano. Seba berzkerdişê têkoşînî ma do seranserî hewteyî 8ê Adare wareyan de bê. Ma heme kesî 3ê Adare de Wareyê Pazarî de pawenê."

	 

	'Ma do vengê Leyla Guvene berz bikerê'

	 

	Endama Meclîsê Cinîyan ê HDKî ya Stenbolî Nîhal Taşe zî bale ante serê girîngîyê 8ê Adare û va seba vera şîdet, tacîzê vera cinîyan veng vejê wareyan de bê û eynî wextî de seba ke bibê vengê grevê vêşanîye Leyla Guvene vera tecrîdî daya destpêkerdene zî do wareyan de bê. Nîhale tewr peyîn dîyar kerde ke do vera tecrîdê keye bigî heta kuçeyê bipeynî do têkoşîn bikerê û gerek bi hawayêke xurt veng bêro vetiş."