Xoverdayîşê Leyla Guvene roja 112. de dewam keno 2019-02-27 14:26:28   AMED - Xoverdayîşê grevê vêşanîye yê bêdem û anêgêrayîşî yê hemsereka KCDyî û Parlementera HDPyî Leyla Guvena ke seba wedarnayîşê tecrîdê serê Rayberê PKKyî Abdullah Ocalanî dest pê kerdbî, kewt roja 112. Sewbîna çalakîyê grevê vêşanîye ke seba eynî waştişan dest pêkerdbî zî bi qerardarî dewam kenî.   Xoverdayîşê çalakîyê grevê vêşanîye yê bêdem û anêgêrayîşî ke bi serkêşîya hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvene dest pêkerdbî dewam kenî. Xoverdayîşê Leyla  Guvene 112 rojan xo dima vera da. Leylaye 8ê Teşrîna Peyêne de Zindanê Amedî de dest bi grevê vêşanîye kerde û badê ke 25ê Çele de serbest ameye veradayene keyeyê xo de çalakîya xo dewam kena. Ganî bêro vîrvistiş ke rewşa weşîya çalakgeran her ke şona xidar bena.   Îzahatê seba piştdayîşê grevî ame astengkerdiş    Însîyatîfê Piştdayîşê Bi zindanê Marmarayî dir bi waştişê ke piştdayîş bidê grevê vêşanî yê Gebzeyî de îzahat bidê. La kesê ke waştî bêrê ware û beşdarê îzahatî bibê hetê polîsan ra ameyî astengkerdiş. Polîsan dîyar kerd ke îzahat hetê Qeymeqamtîyê Gebzeyî ra ameyo qedexekerdiş. Zuleha Guluma ke beşdarê îzahatî bibayne polîsan ra belgeyê derheqê qedexeyî waşt la polîsan belge nîşan nêda.   Çalakîya grevî roj bi roje zêde bena   Sewbîna çalakîya endamê HDPyî Nasir Yagirzî ke seba eynî taleban Hewlêrî de dest bi grevê vêşanîye kerdbî zî kewte roja 99. Çalakîya 14 çalakgeranê bajarê Strasboûrgî yê Fransa û Îmam Şîşî yê Gallerî zî kewte roja 73. Grevê vêşanîye yê bêdem û anêgêrayîşî ke zindananê bakurê Kurdistan û Tirkîye de bi tewrbîyayîşê 300 hepsîyan dest pêkerdbî zî roja 74. xo dima vera da. Sewbîna Mexmûr, Hewlêr, Şengal û xeylê cayanê cîya-cîyayan de zî seba piştîdayîşê grevê vêşanîye çalakîyê grevê vêşanîye pê yenî.   Game nêamî eştiş   Her çiqas raya pêroyî reaksîyonê xo vera îqtîdarî ramojna û vengdayîşo ke yeno kerdiş zî îqtîdar bêvengîyê xo xira nêkerdo.