'Seba aştîye ganî heme cinî 8 Adare de vejîyê wareyan'  

2019-02-25 13:32:24


	 

	WAN - Endamê Meclîsê Dayîkanê Aştîye ya Wanî veng dayî heme cinîyan ke seba heqan ê xo vejîyê wareyan û vatî wa cinî seba aştî, vera zulm û tedayan vejîyê wareyan.

	 

	Cinîyê dinya, Rojhelatê Mîyan û Tirkîya xo seba  8ê Adare Roja Cinîyanê Dinya amade kenê. Cinîyê ke bernameyê înan zelal beno, vera sîstemê serdest ê camêrdan do 8ê Adare de wareyan de bêrê têhet. Dayîkê Aştîye zî nika ra veng dayî cinîyan ke vejîyê wareyan.

	 

	Dayîka Zekîye Kaya da zanayîş ke zulm û teda serê cinîyan de bi serran o nêqedîyayo û wina va: "8ê Adare rengê cinîyan o. Bi serran o zulm serê cinîyan de yeno kerdene. Ma Dayîkê Aştîye şîdet nêwazenê. Ez veng dana heme cinîyan ke vejîyê meydanan."

	 

	Ma seba vîrardişê embazanê xo xo ver bidê'

	 

	Kewê Işike zî da zanayîş ke cinî her wext seba heqanê xo, xo ver daê û veng da heme cinîyan ke  8ê Adare de vejîyê areyan û va yewin waştişê înan o yo ke 8ê Adare de do aştîye bêro û va wa heme cinî seba cinîyan ê xo feda kerdê xo ver bidê.

	 

	Cinîya bi nameyê Hanîfe Koçake zî va ganî heme cinî a roje de vejîyê meydanan, wayîrê cinîyê ke her ca de xo ver danê, vejîyê.

	 

	Hediye Koçake zî 8ê Adare ya heme cinîyan pîroz kerde û va aye sey dayîka Aştîye heme cinîyan dawetê wareyan kena û va ganî heme dayîkî dest bidê yewbînan û vengê xo berz bikerê.