Xoverdayîşê Leyla Guvene roja 109. de dewam keno  

2019-02-24 13:41:35


	 

	AMED - Xoverdayîşê hemsereka KCDyî û Parlementera HDPyî Leyla Guvena ke seba wedarnayîşê tecrîdê serê Rayberê PKKyî Abdullah Ocalanî dest bi grevê vêşanîye yê bêdem û anêgêrayîşî kerdbî, kewt roja 109. 

	 

	Sewbîna çalakîyê grevê vêşanîye ke seba eynî waştişan dest pêkerdbî zî bi qerardarî dewam kenî. Xoverdayîşê çalakîyê grevê vêşanîye yê bêdem û anêgêrayîşî ke bi serkêşîya hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvene dest pêkerdbî dewam kenî.

	 

	Çalakîya grevî roj bi roje zêde bena

	 

	Xoverdayîşê Leyla Guvene 109 rojan xo dima vera da. Leylaye 8ê Teşrîna Peyêne de Zindanê Amedî de dest bi grevê vêşanîye kerde û badê ke 25ê Çele de serbest ameye veradayene keyeyê xo de çalakîya xo dewam kena. Seba wedartişê tecrîdî zî piştdayîşê çalakî zî xeylê zêde bîyê. La ganî bêro vîrvistiş ke rewşa weşîya çalakgeran her ke şona xidar bena. 

	 

	Bi seyan hepsî grev de yê

	 

	Sewbîna çalakîya endamê HDPyî Nasir Yagizî ke seba eynî taleban Hewlêrî de dest bi grevê vêşanîye kerdbî zî kewte roja 96. Çalakîya 14 çalakgeranê bajarê Strasboûrgî yê Fransa û Îmam Şîşî yê Gallerî zî kewte roja 70. Grevê vêşanîye yê bêdem û anêgêrayîşî ke zindananê bakurê Kurdistan û Tirkîye de bi tewrbîyayîşê 300 hepsîyan dest pêkerdbî zî roja 71. xo dima vera da. Sewbîna Mexmûr, Hewlêr, Şengal û xeylê cayanê cîya-cîyayan de zî seba piştîdayîşê grevê vêşanîye çalakîyê grevê vêşanîye pê yenî. 

	 

	Game nêamî eştiş

	 

	Her çiqas raya pêroyî reaksîyonê xo vera îqtîdarî ramojna û vengdayîşo ke yeno kerdiş zî îqtîdar bêvengîyê xo xira nêkerdo.