
Xoverdayîşê Leyla Guvene kewt roja 105. 

2019-02-20 14:24:04


	&nbsp;

	AMED - Xoverdayîşê hemsereka KCDyî û Parlementera HDPyî Leyla Guvena ke seba wedarnayîşê tecrîdê serê Rayberê PKKyî Abdullah Ocalanî dest bi grevê vêşanîye yê bêdem û anêgêrayîşî kerdbî, kewt roja 105. Sewbîna çalakîyê grevê vêşanîye ke seba eynî waştişan dest pêkerdbî zî bi qerardarî dewam kenî.

	&nbsp;

	Xoverdayîşê çalakîyê grevê vêşanîye yê bêdem û anêgêrayîşî ke bi serkêşîya hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvene dest pêkerdbî dewam kenî. Xoverdayîşê Leyla &nbsp;Guvene 105 rojan xo dima vera da. Leylaye 8ê Teşrîna Peyêne de Zindanê Amedî de dest bi grevê vêşanîye kerde û badê ke 25ê Çele de serbest ameye veradayene keyeyê xo de çalakîya xo dewam kena. Ganî bêro vîrvistiş ke rewşa weşîya çalakgeran her ke şona xidar bena.

	&nbsp;

	Parlamentera Îrlandî şî serdayîşê Leylaye&nbsp;

	&nbsp;

	Leylaya ke mudaxeleyê tibî qebûl nêkena ame dîyarkerdiş ke êdî warê qiseykerdişî de zehmetîyan ancena û zaf bêhal a. Leylaye ke hetê heyetê ewropî ra amî zîyaretkerdene, vizîr zî keyeyê xo yê ke binê abluqa de yo hetê parlamentera Îrlanda ke parlamentera Parlamentoyê Ewropayî Martîna Andersone ra amî zîyaretkerdene. Martîna ke dimayê şî serdayîşê Leylaye serê hesabê xo yê Twîtter de nê mesajî pare kerde: "Ez verê Leyla Guvena ke 55 serrî ya hem xemgîn û hem bi kelecan visya ya, la hetêke mi zî ci ra hêz girewt. Mi aye zaf bi hêzdar dî."

	&nbsp;

	Sewbîna çalakîya endamê HDPyî Nasir Yagirzî ke seba eynî taleban Hewlêrî de dest bi grevê vêşanîye kerdbî zî kewte roja 92. Çalakîya 14 çalakgeranê bajarê Strasboûrgî yê Fransa û Îmam Şîşî yê Gallerî zî kewte roja 66. Grevê vêşanîye yê bêdem û anêgêrayîşî ke zindananê bakurê Kurdistan û Tirkîye de bi tewrbîyayîşê 300 hepsîyan dest pêkerdbî zî roja 67. xo dima vera da. Sewbîna Mexmûr, Hewlêr, Şengal û xeylê cayanê cîya-cîyayan de zî seba piştîdayîşê grevê vêşanîye çalakîyê grevê vêşanîye pê yenî.

	&nbsp;

	Nika pêropîya zindanan de 300 ra zêde hepsîyê sîyasî grevê vêşanîye yê bêdem û anêgêrayîşî de yî.&nbsp;

	&nbsp;