Debara cinîyanê Îdirî 'Nanê tenûre' 

2019-02-19 13:12:12


	 

	Zeynep Durgut

	 

	ÎDİR - Mintiqaya Serhêdî bi serran o ke nano tewr bi tehm destê cinîyan yeno pewtiş. Îdir de 5 cinîyê ke kargehê nan pewjnayîşî akerdê û pîya bi hewayêke hempar xebityenê.

	 

	Mintiqaya Serhedî de bi serran o cinî nanê rojane tenûre de pewjnenê. Nano ke hetê cinîyan ra bi rojan ameyne pewjnayîş, nika Îdirî de cinîyan kargehê ke nan bipewjnê akerdê û bi viraştişê nanê tenûre debara xo kenê. Kargeho ke hetê 5 cinîyan ra ameyo akerdiş, şar eleqeyêke pîl ramojneno û netîceyê xebata hempar de nano tewr bi tam vejîyeno meydan.

	 

	'Ganî cinî hêzê xo yê awankerdişî nîşan bido'

	 

	Derheqê kargehî de Necîbe Karakuşe qisey kerde.  Necîbeye da zanayîş ke, her warê ekonomî cinîyan rê ameyê padayîş û wina va: "Ma tîya 5 cinî pîya xebityenê. Ma serê siba saete 4an de dest bi kar kenê û heta şan de xebityenê. Vernê de ma mîrê xo amade kenê û dima ra ma nan pewjnenê. Tîya heme cinî pîya xebityenê. Gama ke hetê ekonomî yan zî manewî de problem bibê, ma pîya çareserî vînenê. Na mintiqa de bi tu hewa seba cinîyan warê xebate nêameyê akerdiş. Vera çinbîyayîşê karî ma çareserîyêke wina dî. Her warê komelî de cinîyan rê qedexe kerdê. La lazimo ke cinî xo ver bidê û hêzê xo yê awankerdoxî nîşan bidê. Çîyêke cinî nêkerê çin o."

	 

	'Ma her roje 5 torbe ardan pewjnenê'

	 

	Cinîyan ra Cahîde Sariye zî arde ziwan ke aye bi pewjnayîşê nanê tenûre debara keyeyê xo kena û wina va: "Ma serê siba rew wirzenê û dest bi kar kenê. Seba ke nano tewr bi tehm vejê, rew ma dest pêkenê. Kargehê ke cinî ci de xebityenê kêfweşî dano merdiman. Hewceyê ma bi camêrdan çin o. Ma bi keda xo qezenc kenê. Ma her roje 5 torbe ardan pewjnenê. Ma zaf zêde benê rincan, la ma bi keda destê xo qezenc kenê."

	 

	'Ganî cinî serê linganê xo de vinderê û xo ver bidê'

	 

	Tewr peyîn xebatkaran ra Fatma Karakuşe zî da zanayîş ke cinî her warê cuyayîşî de yê û wina dewam kerde: "Verê ra heta nika ma nanê xo bixo pewjnenê. Verê ma rojê nanê pewjnayîşî kerdêne. Nika zî ma keda destan danê û vera nê qezenc kenê. Hende cinî pîya bê, zaf bi mana û girîng o. Ganî cinî her warê cuyayîşî de ca bigîrê. Kesê ke ekonomîya keyeyî rayîra benê cinî yê. Labelê tewr zêde zî ked û heqê cinîyan yenê îhlalkerdiş. Coka cinî serê linganê xo de vinderê û xo ver bidê."