Çalakîya Leyla Guvene roja 99. de dewam kena  

2019-02-14 13:43:32


	 

	AMED - Rewşa weşîya hemsereka KCDyî û parlementera HDPyî Leyla Guvena ke çalakîya grevê vêşnîye de ya û çalakîya xo roja 99. de dewam kena, çend şona xirabêr bena.

	 

	Çalakîya grevê vêşanîye ke hemverê tecrîdkerdişê Rayberê PKKyî Abdullah Ocalanî de bi serkêşîya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke dest pêkerdbî, roja 99. de dewam kena. Leylaye seba wedarnayîşê tecrîdo girankerde ke serê Rayberê PKKyî Abdullah Ocalanî de yeno meşnayene, 8ê Teşrîna Peyêne de Zindanê Amedî de dest bi grevê vêşanîye kerdbî û badê ke 25ê Çele de serbest ameybî veradayene keyeyê xo de çalakîya xo dewam kena.

	 

	Weşîya Leylaye çend şina xirabêr bena

	 

	Rewşa weşîya Leylaye çend şina xirabêr bena. Ame vatene ke, tansîyonê Leylaye zaf kewto, bêhal bîya,  problemê sey hewnî,  zor şimitişê  awe, krampê madeyî estî û hemverê boye û roşinî de zêde hesasbîyayîş virazîyayê. Eynî wextî de ame neqlkerdiş ke bi Leylaye dir halînê pasurkan ke peyda bibi zî lezgîn bîyo. Leyla êdî nêeşkena roşo û dergkerde manena.

	 

	Leylaye roja 8ê Teşrîna 2018an ke dest bi çalakî kerda, piştdayîş zî seba çalakîya aye dewam kena û xeylê cayê dinya de roşnvîr, nuştox, sîyasetmedar û akademîsyenî aye rê mesajê piştdayîşî eşrawenê.

	 

	Roja 100. de do çalakî bêro kerdene

	 

	Çarçeweya çalakîyanê HDPyî de do roja 100. yê çalakîya Leyla Guvene ke kewena 15ê Sibate de do 15 bajaran de rayîrşîyayîş bêro organîzekerdene. Rayîrşîyayîş do Colemêrg, Wan, Qers, Idîr, Bedlîs, Agirî, Mûş, Şirnex, Mêrdîn, Sêrt, Êlih, Dêrsim, Çewlîk, Dîlok û Riha de 7 hetan ra bêro dest pêkerdene û verê keyeyê Leyla Guvena ke Baglara Amedî de ronişena saet 12.00î de do îzehet bêro dayene.

	 

	Çalakîya grevê vêşanîye dewam kenî

	 

	Sewbîna çalakîya Endamê Meclîsê HDPyî Nasir Yagizî ke Hewler bi eynî taleban dest pêkerdbî zî roja 86. de, çalakîya grevê vêşanîye ya Strasbaurgî û ya Îmam Şîş yê Gallerî roja 60. de, çalakîya koma ewil ke 16ê Kanûne de zindanan de dest pêkerdbî roja 59. de, çalakîya endama Meclîsê Îştar ya Mexmûrî Fadîle Toke roja 26. de û çalakîya Hemsereka DBPyî Sebahat Tuncel û parlamentera HDPyî ya Colemêrgî ya verê Selma Irmake zî roja 31. dewam kena.

	 

	Nika pêropîya zindanan de 292 ra zêde hepsîyê sîyasî grevê vêşanîye yê bêdem û anêgêrayîşî de yî.