Maya Cîhan Tamurî: Wa her kes wayîrê têkoşînî vejîyo 

2019-02-06 13:59:51


	 

	WAN - Cîhan Tamuro ke hepisxaneyê Asayîşê Berz ê Wanî de bi 53 rojî yo grevê vêşanî de yo. Cîhan bi 5 hepsîyan dir grev de yo. Maya Cîhan, Hanîfe Tamure veng da ke ganî tewr zêde hîsgêrî bêro ramojnayîş û va: "Domanê ma têkoşînêke heqdar danê. Wa tu kes vera nê têkoşînê heqdar keyeyê xo de nêroşno ro."

	 

	Zindanê Asayîşê Berz ê Wanî de 5 hepsî bi amancê tecrîdê serê Rayberê PKKî Abdullah Ocalanî bêro wedartiş, kewtî grev û roja 53ine de dewam keno. Maye û pîyê hepsîyê bi nameyê Cîhan Tamuro ke şî pêvînayîşê ey, vengdayîşê hîsgêrî raya pêroyî kerdî.

	 

	Pîyê Cîhanî, Siddik Tamurî seba ke lajê xo dir pêvînayîş bikero, Geverê Colemêrgî ra ame Wan wina va: "Heta weşîya lajê mi dest bido, ma do şêrê serdayîşê ey. 53 rojî asan nîyo. Seba têkoşînê ke pê bawer keno, kewto grev. Moralê ey baş bi. Lajê mi va heta waştişê înan bi ca nêrê, do çalakîya xo dewam bikerê. Zaf kîlo dayo. Verê lajê mi sêneyê xo ra emelîyat bibi. No semed ra problemê weşîye cuyeno. La qet ma rê nêdano hîskerdiş."

	 

	Siddikî veng da raya pêroyî û va her kesê ke vanê ma wayîrê wijdan gerek veng bidê vengê hepsîyan.

	 

	Hanîfe Tamure zî arde ziwan ke hema ke merdişî nêvirazîyayê, ganî waştişê hepsîyan bi ca bêrê û wina va: "Îqtîdarê sîyasî vano ke ‘Kurdî çin ê, heqê merdiman çin o' Ez veng dana hukmatî. Hema ke merdişî nêvirazîyayê, waştişê domananê ma bi ca bîyarê. Parlamentera ma Leyla Guvene ameya sewîyeya merdişî. Bedenê aye awe zî nêgîno. Ez veng dana her kesî, wa vera têkoşînê heqdra keye de nênişnê ro."