Esengul Demîr: Mesajo ke ma Bakirkoyî ra girewt 

2019-02-04 14:18:07


	 

	STENBOL - Hemsereka Bajarê HDPî ya Stenbolî Esengul Demîre, dîyar kerde ke şar çalakîya grevê vêşanîye ya Leyla Guvene de ke zîndanan de vila bî wayîr vejîyayî û seba înan mesaj ameyo dayîş. Esengule va, "No seba stenbolî destpêk o"

	 

	Vizîr bi des hezaran kesê ke Warê Azadîye ê Bakirkoyî de kom bî, bî vengê Hemsereka Kongreya Komelê Demokratîke (KCD) û parlamentera Partîya Demokratîke ya Şaran (HDP) ya Colemêrgî Leyla Guvene û hepsîyê ke zîndanan de grevê vêşanîye de yê. Hemsereka HDPî ya Bajarê Stenbolî Esengul Demîre mîtîng û mesajê ke mîtîng de ameyî dayîş şîrove kerde.

	 

	'Şarî îspat kerd ke ê xoverdayîş rê wayîr vejîyenê'

	 

	Esengule arde ziwan ke bi rojan înan seba mîtîngî xebat dayî meşnayîş û wina va: "Wexto ke ma girseyo ke ame mîtîng ma ewnîyayî, ma dî ke xebatê ma seba nê mîtîngî netîce girewto. Şarê ma bi beşdarbîyayîşê xo yê mîtîngî nîşan da ke ê xoverdayîş rê wayîr vejîyenê. No seba Stenbolî destpêk o. Bi taybet ma va ke ma verê hemrayê xo yê zîndanan de yê û no xoverdayîş hetê şarî ra zî yeno tesdîqkerdiş. La xebatê dimayê nê zî girîng û krîtîk ê. Ma do reyna keye bi keye bigeyrê û xebata xo tewr pîl bikerê."

	 

	'Ma mesajêke zelal girewt'

	 

	Derheqê mesajê kesê ke beşdarê mîtîngî bî de zî Esengule wina va: "Şarê ma nîşan da ke ê vera tecrîdî yê û verê nîzdîyê 300 kesê ke zîndanan de vera tecrîdî grevê vêşanî de yê. Şarê ma bi beşdarbîyayîşê xo yê mîtîngî mesajo ke ê verê xoverdayîşî de yê dayî. Şarî ma nê mesajî bi beşdarbîyayîşê xo û sloganê xo mesajêke zelal ê xoverdayîşî da ma."