'Ma do sey wayanê Leyla Guvene têkoşînê xo bidomnî' 

2019-01-23 14:18:47


	 

	Gülistan Azak

	 

	AMED - Seke yeno zanayene çend rojî verê cinîyê ke seba piştîdayîşê grevê vêşanîye yê Leyla Guvene çalakîya rayîrşîyayîşî organîze kerdbî, hetê polîsan ra ameybî derbkerdiş û erd ra ameybî antiş. Nê cinîyan ra yew zî Gonul Adibeli bîye. Adibeliye dîyar kerde ke ê do sey wayanê Leyla Guvene têkoşînê xo bidomnî û sere nêronî. 

	 

	Parlamentera Partîya Demokratîke ya Şaran (HDP) û Hemsereka Kongreya Komela Demokratîke (KCD) Leyla Guvene seba wedarnayîşê tecrîdo ke serê Rayberê PKKyî Abdullah Ocalanî de yeno meşnayene peynî bibo, dest bi grevê vêşanîye kerdbî û çalakîya aye roja 77. de dewam kena. 

	 

	20 çeleyî de seba piştîdayîşê çalakîya Leylaye cinîyî verê Zindanê Padaye yê Tîpa Eyî yê Amedî de ameybî tê het û çalakîya rayîrşîyayîşî pê ardbî. Polîs hêrişê cinîyan kerdbî û netîceyê hêrişan de 15 cinî ameybî tepiştiş. Cinî badê îfadedayîşî serbest ameybî veradayîş. Nê cinîyan ra yew zî Endama Platformê Platformê Cinîyan yê Amedî yê Dicle (DAKAP) Gonul Adibeli bîye. 

	 

	'Ma do seba wedarnayîşê tecrîdî têkoşîn bidî'

	 

	Adibeliye qiseykerdişê xo de wina va: “Hêrişê polîsan yê hemverê cinîyan nîşaneya zihnîyetê bawikserren bî. Polîs kişta Zindanê Amedî de hêrişê ma kerd. Ma do sey wayanê Leyla Guvene têkoşînê xo bidomnî. Polîsê ke hêrişê ma kerdî, mualemeya dişmenî bi ma kerdî. Polîs lingê mi tadayî. Badê ke mi va dejeno, ê vatî ‘seba ke bişiko ma tadanî.’ Wexto kem a berdî kontrolê weşî doktor zî heqaret bi ma kerd. Tepiştiş ma nêterneno. Ma do heta peynî heqê xo bipawî û seba wedarnayîşê tecrîdî têkoşîn bidî.”