Dr. Fîlîz Unal: Grevê vêşanî ameyê sewîyeyêke krîtîk 

2019-01-18 13:50:01


	 

	Habîbe Eren

	 

	ENQERE - Endama ATO Dr. Fîlîz Unale dîyar kerde ke grevê vêşanî yê hepisxaneyan kewtê sewîyeyêke krîtîk û wina va: Seba ma tewr krîtîk rojê mabêne 45-75an ê. Hêzê qelbî kono, rîtmê qelbî xira beno. Çîyo ke ma tewr zêde tersenê no yo."

	 

	Çalakîya grevê vêşanî ya parlamenter Leyla Guvene kewte roja 72ine û ê koma yewine zî kewt roja 34an. Endama Odaya Tabîban ê Enqereyî (ATO) Doktor Fîlîz Unale derheqê babete de şîrove kerde.

	 

	'Ganî vîtamînê B1 bêro dayene'

	 

	Fîlîze da zanayîş ke aye sey doktor grevan tesdîq nêkenê la hemverê îradeyê kesan rêzdar ê û wina dewam kerde: "Ma qebul nêkenê ke kesêke fek bedenê xo ra vera bido. Ganî rewşa ke netîceyê grevî de yenê meydan înan bêro vatene. Ma hemverê îradeyê înan rêzdar ê. Seba nê protokol estê. Ganî kesê ke grev de yê awe, sole, şekir û vîtamînê B1 bixebitnê. Roja ewil ê grevî eke nê nêkerê rîsk tewr zêde beno. Ganî nê vîtamînî bêrê dayene."

	 

	Fîlîze dewamê qiseykerdişê xo de wina va: "1-3 rojan de kîloyêke yeno dayîş. Depoyê bedenê înan zêde veng beno. Made tîya de zaf krîtîk o. Mîyanê wextî de dejî madeyî yeno antene û made zêde tehemulê vengbîyayîşî nêkeno. Roja 4 û 7an de bêhalî dest pêkeno. Kes hewceyê bi roniştişî vîneno. Rojê 7 û 14an krîtîk ê. Tansîyone kona. Nêweşîya qelb, pişik û damaran tewr zêde bi tesîr benê. Rojê 34 û 42an de problemê nêvîyayîşî dest pêkenê. Roja 42an de bêeşnawitiş dest pêkeno. Seba ma wextê tewr krîtîk rojê mabêne 45-75an de yê. Nika grevê vêşanî yê hepisxaneyan ameyê sewîyeya tewr krîtîk. Tersê ma yo tewr pîl xirabîyayîşê rîtmê qelbî yo. Eke kes qebul bikero ma eşkenê mudaxale bikerê. La eke qebul nêkero/a ma nêeşkenê mudaxele bikerê."

	 

	Fîlîze arde ziwan ke babeta grevê vêşanî de seba bale biancê ser, belge doktoranê hepisxaneyan û wezaretan rê eşrawitê û va ganî damarê rîtmê qelbî û awa bedenê înan bêro taqîbkerdene. Heto bîn ra Fîlîze tewr peyîn qiseykerdişê xo de arde ziwan ke ganî hepsî qetî vîtamînê B1 bigîrê.