
HDP: Komkujiya Ermeniyan qebûl bikin! 

2021-04-24 09:06:38


	&nbsp;

	ENQERE - Bi minasebeta salvegera Komkujiya Ermeniyan HDP daxuyaniyek da û got: "Tiştê ku anîn serê gelan, di nav polîtîkayeke yekpare de hatin pêkanîn. Qebûlkirin, naskirin û tezmînkirina vê komkujiyê ji bo avakirina siberojeke azad, hevpar û wekhev pêdiviyeke mezin e.&nbsp;

	&nbsp;

	Lijneya Rêvebirina Navendî ya Partiya Demokratîk a Gelan (HDP) bi minasebeta komkujiya Ermeniyan daxuyaniyeke nivîskî dan.&nbsp;

	&nbsp;

	Daxuyaniya HDP'ê wiha ye:&nbsp;

	&nbsp;

	"Di 24’ê Nîsana 1915’an de 250 rewşenbîr û siyasetmedarên Ermenî ji aliyê Teşkîlat-i Mahsusa ya girêdayî rêxistina Cemiyeta Îttihat û Terakkiyê ji malên xwe hatin wergirtin û bi zorê hatin sirgûnkirin û qetilkirin. Ev roj, roja destpêkirina Komkujiya Ermeniyan bû. Gelê Ermenî, ji cih û warên xwe yên hezaran salan hatin sirgûnkirin û gelek jî jê hatin qetilkirin. Hemû hebûn û şopên gelên Mesîhî ji Anatoliyayê hate tunekirin, mal û milkên Ermenan û dewlemendiya şaristaniya wan hate desteserkirin. &nbsp;

	&nbsp;

	Komkujî li ser vê axê pêk hat

	&nbsp;

	Tirkiye 106 sal in bi Komkujiya Ermenan re hevrûbûneke esas û rasteqînî nekiriye. Ji ber ku ew hevrûbûn pêk nehatiye, lewma jî ew sûc îro jî di rojevê de ye û tê nîqaşkirin di encamê de cudakarî û vederkirin îro kî berdewam dike. Komkujiya Ermenan beriya her tiştî meseleyeke însanî, hiqûqî û civakî ye. Ev karesata mezin nikare bibe amûrê serdestan û hesabên wan ên siyasî û rojane. Hem li hindur hem jî li derve, ev komkujî nikare ji ber polîtîkayên rojane bê îstismarkirin. Lê mixabin hem desthilatdarên Tirk, hem jî hêzên navneteweyî vê trajediyê li gorî hesab û berjewendiyên xwe bi kar tînin û rê li ber naskirin û qebûlkirina vê komkujiyê digirin. Ev yek nayê qebûlkirin û divê ev siyaseta durû rojek berî rojekê bê terikandin. Komkujiya Ermenan li vê axê hate pêkanîn, divê edalet jî li vê axê bê pêkanîn.&nbsp;

	&nbsp;

	Polîtîkayeke yekpar tê pêkanîn

	&nbsp;

	Komkujiya Ermenan di dîroka vî welatî de diyardekeye girîng e. Semboleke dîrokî ye û xeta qirêj a hêzên kûr di nav dewletê de nîşan dide. Polîtîkayên qirkirinê yên li dijî rûm, suryan, keldan, kurd, elewî, êzidî hatin pêkanîn jî parçeyek û berdewama vê zihniyetê ne. Tiştê ku anîn serê gelan, di nav polîtîkayeke yekpare de hatin pêkanîn. Qebûlkirin, naskirin û tezmînkirina vê komkujiyê ji bo avakirina siberojeke azad, hevpar û wekhev pêdiviyeke mezin e.&nbsp;

	&nbsp;

	Di 106’emîn salvegera komkujiya Ermenan de, em êş û azara gelê Ermenî û trajediya însanî ya mezin di dilê xwe de hîs dikin û hemû qurbaniyên ku bi awayekî sîstematîk hatin qetilkirin, bi rêzdarî û bi rehmet bi bîr tînin."

	&nbsp;