ÎDIR -Di daxuyaniya di ji bo 2'emîn salvegera qetilkirina Jîna Emînî ya li Îdirê de wiha hat gotin: “Bi felsefeya xwe ya 'Jin jiyan azadî' em ê li her qadê têkoşîna xwe bidomînin ku li cîhanek azad û wekhev li dijî tifaqên qirêj bijîn. Polîtîkayên jin û zarokan diparêzin pêş bixin." 

 

Rêxistinên Bajarê Îdirê ya Partiya Wekhevî û Demokrasiyê ya Gelan (DEM Partî) û Partiya Herêmên Demokratîk (DBP) bi boneya 2’yemîn salvegera qetilkirin Jîna Emînî ya ku di sala 2022’an de li Îranê ji aliyê “polîsên exlaqê” ve hat qetilkirin, daxuyaniyek dan. Hevşaredar, endamên meclîsa şaredariyê, parlamenterê  DEM Partiyê yê Îdirê Yilmaz Hun, nûnerên saziyên sivîl û gelek welatî li ber avahiya rêxisitna DEM Partiyê ya Bajêr kom bûn û heta ber Bîrdariya Musa Anter a li Kolana Cumhuriyetê meşiyan. Girseya gel di meşê de dirûşma "Jin jiyan azadî" berz kir, pankarta "Ji Cemîle heta Leyla, ji Jîna Emînî heta Narîn em li qadan li dijî polîtîkayên bêcezakirinê ne." hat vekirin.

 

'Jîna Emînî ji bo bi mîlyonan mirovên bindest bûye qêrîna edaletê'

 

Di daxuyaniyê de Hevseroka DBP'ê ya Îdirê Kezban Karasû Tanca axivî û Jîna Emînî bi bîr anî û bal kişand ser zextên Îranê yên li ser jinan. Kezban got, “Îro em di duyemîn salvegera qetilkirina jina Kurd Jîna Emînî de hatin gel hev. Ev bûyera ku di 16’ê Îlona 2022’an de ji aliyê polîsên exlaqê yên Îranê ve hate binçavkirin, bi mirinê re rû bi rû hat,  ji bo hemû gelan veguherî qîrîna edaletê.  Jîna Emînî ne tenê parçeyek ji zext û zordariya sîstematîk a rejîma mêtinger a Îranê ye ku li ser jinan tê meşandin, di heman demê de nîşaneya polîtîkayên dewletê yên li dijî nasname, çand û têkoşîna azadiya gelê Kurd e."

 

'Li vî welatî jiyana jin û zarokan nîne'

 

Kezban, anî ziman ku ji ber desthilatdariya AKP'ê MHP'ê ya li hemberî jinan bi nûçeyên tacîz û tecawizê yên li hemberî jinan dest bi rojê kirine û got ku ew weke jin bi dirûşma "Jin jiyan az adî" xwe rêxistin dikin . Kezban got, “Li vî welatê ku em hema hema her roj bi nûçeyên kuştina jinan û îstîsmara zayendî şiyar dibin, jiyana  jin û zarokan tune ye. Di vê rewşê de tundî, tacîz, destavêtin û îstîsmar her ku diçe zêde dibe. Lêgerîna delîlên şênber ji bo sepandina Cezayên sûc li ser tawanên li dijî jin û zarokan dijminatiyê ye. Di destpêka rojê de, yekem tiştê ku divê hûn bikin ev e ku hûn li jiyana xwe baldar bin. Li vî welatî jin her roj li kolan ji bo edaleta rast, ne edaleta mêr, diqîrin kur kujerên jin û zarokan bên cezakirin. Em ê li dijî tifaqên qirêj ên li dijî zarok û jinan têkoşînê mezin bikin."  

 

Daxuyanî bi çepikan bi dawî bû.